Böss

Sie si wider einisch ga loufe, so, wie si scho mängisch si ga loufe. Sie hett der Rucksack packt, är hett ne treit, är hett navigiert u sie hett ihm drigredt.

A däm Tag hett es se tünkt, er füehr se zimlech im Gaggo ume, u wo sie hett gseit, öb si nid lieber no chli am See na wöuge, hett är gmeint, obe düre sigs viu schöner. So isch si ihm hingernache. Es isch e heisse Summertag gsi, u si hett gschwitzt wie blöd. Si si ging höcher ufe cho, aber vo Ussicht isch ke Red gsi. Zmitts i so me ne Villequartier si si gsi u um se ume nüt aus höchi Hecke oder Husmuure. Äntlech isch es de wider chli gredi us u de o wider nidsi gange.

Wo si scho fasch wider dunger bim See si gsi, hett si gmeint, am Ufer nah wärs äuä doch bau schöner gsi. U nid grad ganz so aschträngend. Guet – so nätt hett sis vilech nid formuliert. Uf jede Fau isch o är chli hässig gsi, hett aber witer uf d Charte uf sim Handy gluegt u gseit, de söu si doch der Böss näh.

Uf das abe hett si d Schue bunge u isch dervo. Ime ne zügige Tämpo. Dass är ihre wär hingernache cho, hett si nid müesse befürchte, das hätt ihm der Gring nid zuegäh. U verloufe, da isch si sicher gsi, hett me sech o nid chönne i me ne Gebiet, wo jedi Chrützig mit gäube Wägwiser isch verseh gsi.

So isch si zügig ihrem Ziu zue. Das isch aber viu witer wäg gsi, aus si gmeint hett. Der Böss aber hett si nie i Erwägig zoge. Das de sicher z letscht. Ganz abgseh dervo, dass si das o nid hätt chönne. Ds Portemonnaie isch nämlech im Rucksack gsi. Genau so, wie d Wasserfläsche u der Öpfu. Uf ds Handy hett si guet möge verzichte. Aber groukt hätt si gärn zwüschine eini.

Wo si nach füf Schtung de äntlech zrugg im Hotel vor eme ne chaute Bier isch ghocket, isch o är zue re a Tisch cho. D Wäut isch schnäu wider ir Ornig gsi.

Sider si si no mängisch zäme ga loufe oder Outo gfahre. Hei zäme gchochet oder öppis kreiert. U ging, we si nim wider zviu hett wöue drirede, hett er nume gmeint, si söu doch süsch de eifach der Böss näh. Meh hetts nid brucht, für dass si sech si einig worde.